Rrjetet kriminale po përdorin taktika gjithnjë e më agresive për të rekrutuar të rinj në veprimtari të paligjshme, paralajmëron Europol. Në përgjigje të këtij rreziku në rritje, është krijuar një Task Forcë Operacionale e re, “OTF GRIMM”, e cila drejtohet nga Suedia dhe përfshin agjenci ligjzbatuese nga tetë shtete europiane, përfshirë Gjermaninë, Francën dhe Holandën.

Këta të rinj përdoren për trafik droge, mashtrime online, sulme kibernetike dhe zhvatje. Shumë prej tyre rekrutohen në internet dhe detyrohen të kryejnë edhe vrasje, ndërsa shfrytëzohen si “mburojë” për të mbrojtur drejtuesit e rrjeteve kriminale.

Sipas Europol, sinjalet e hershme që prindërit duhet të ndjekin përfshijnë:
• Përdorim të aplikacioneve të koduara pa arsye të qarta;
• Sjellje dhe vlera të reja të pazakonta;
• Gënjeshtra të shpeshta dhe shmangie pyetjesh;
• Shfaqje me shoqëri të panjohur dhe më të rritur;
• Objekte të reja pa burim të qartë financiar;
• Rënie të interesit për shkollën dhe aktivitetet sociale.

Europol apelon për bashkëpunim mes familjeve, shkollave dhe institucioneve për të mbrojtur të rinjtë nga krimi i organizuar dhe për të ndërprerë këtë zinxhir shfrytëzimi që po cenon të ardhmen e tyre.