Eva Longoria ka rrëfyer se lindja e djalit të saj, Santiago, në moshën 43-vjeçare ishte një vendim i ndërgjegjshëm dhe i duhur. Në një intervistë për Sunday Times Style, aktorja 50-vjeçare tha se mëmësia në një moshë më të pjekur i ka dhënë asaj më shumë mençuri dhe durim.

“Ishte koha e duhur,” u shpreh Longoria. “Kur bëhesh nënë në të 40-at, ke shumë më tepër qetësi dhe përvojë. Për shumë vite gjithçka kishte të bënte me mua.”

Aktorja tregoi se dekadat e mëparshme ia kishte kushtuar karrierës dhe vetes, ndërsa mëmësia e vonshme i dha mundësinë të hynte në një kapitull krejtësisht të ri. “Kisha udhëtuar, kisha punuar fort, kisha përjetuar çdo gjë që doja për karrierën time. Tani çdo projekt është thjesht ‘qershia mbi tortë’ dhe mund ta ndaj me djalin tim,” tha ajo.

Longoria theksoi se tani pranon një rol vetëm nëse përfshin njerëz me të cilët dëshiron vërtet të punojë, duke qenë se çdo angazhim e largon nga koha me Santiagon.
“Familja ime është përparësia ime. Nëse them ‘po’ për një projekt, duhet të jetë diçka që e dua me të vërtetë dhe me njerëz që respektoj,” shtoi ajo.