Ministri i Jashtëm i Kinës, Wang Yi, reagoi ashpër ndaj komenteve të kryeministres japoneze Sanae Takaichi për mundësinë e një ndërhyrjeje ushtarake në rast të një sulmi kinez ndaj Tajvanit, duke e cilësuar qëndrimin e Tokios “tronditës” dhe “sinjal të rrezikshëm”.

Sipas një deklarate zyrtare të publikuar të dielën në faqen e Ministrisë së Jashtme kineze, Wang akuzoi Japoninë se po kalon një “vijë të kuqe” dhe se po përpiqet të ndërhyjë ushtarakisht në çështjen e Tajvanit. Ai iu referua deklaratave të 7 nëntorit, kur Takaichi tha në parlament se një agresion i mundshëm kinez ndaj Tajvanit mund të shkaktonte një përgjigje ushtarake nga Japonia.

Tensioni që ka shpërthyer prej më shumë se dy javësh është cilësuar si kriza më e rëndë në marrëdhëniet Kinë–Japoni prej vitesh, duke prekur jo vetëm fushën diplomatike, por edhe lidhjet tregtare dhe kulturore ndërmjet dy vendeve. Të premten, Kina i dërgoi një letër Sekretarit të Përgjithshëm të OKB-së, António Guterres, duke paralajmëruar se do të mbrohet “me vendosmëri”.

Pekini e konsideron Tajvanin pjesë të territorit të vet dhe nuk e ka përjashtuar përdorimin e forcës për të marrë kontrollin e ishullit. Qeveria e Tajvanit i ka hedhur poshtë pretendimet e Kinës, duke deklaruar se vetëm populli tajvanez mund të vendosë për të ardhmen e vendit.

Ministria e Jashtme e Japonisë nuk komentoi menjëherë deklaratat e Wangut, por një ditë më parë e kishte cilësuar letrën e Kinës drejtuar OKB-së si “plotësisht të papranueshme”, duke theksuar se Japonia mbetet e përkushtuar ndaj paqes.

Nga ana tjetër, Ministria e Jashtme e Tajvanit reagoi ashpër ndaj akuzave të Pekinit, duke thënë se letra dërguar OKB-së “shtrembëron me qëllim faktet historike” dhe shkel Nenin 2(4) të Kartës së OKB-së, që ndalon kërcënimin ose përdorimin e forcës në marrëdhëniet ndërkombëtare.

Në deklaratën e tij, Wang Yi paralajmëroi se Kina “duhet të kundërpërgjigjet me vendosmëri” për të mbrojtur sovranitetin dhe integritetin territorial. Ai shtoi se nëse Japonia “vazhdon në rrugën e gabuar”, vendet e tjera “do të kenë të drejtë të rishqyrtojnë krimet historike të Japonisë” dhe të parandalojnë “ringjalljen e militarizmit japonez”.

Kina është partneri i dytë më i madh tregtar i Japonisë pas SHBA-ve, duke importuar rreth 125 miliardë dollarë mallra japoneze gjatë vitit 2024, kryesisht pajisje industriale, gjysmëpërçues dhe automjete, sipas të dhënave të UN COMTRADE.