Pas lajmeve të përhapura se nëna e 27-vjeçarit shqiptar Sulo Halili nga Tepelena, i cili u vra në Greqi më 8 nëntor, kishte ndërruar jetë nga tronditja, familja ka reaguar duke i mohuar kategorikisht këto pretendime.

“Gjithçka është mirë, gruaja është mirë. Çfarë budallallëqesh janë këto që po shkruajnë? E di që i shkruajnë kudo, por fola me të. Duam të dimë kush e publikoi i pari,” tha tezja e 27-vjeçarit, duke i dhënë fund dyshimeve që qarkulluan në media dhe rrjete sociale.

Sulo Halili u gjet i vrarë dhe i djegur brenda makinës së tij në rajonin Skourta të Viotias, në Greqi. Sipas hetimeve paraprake, i riu dyshohet të jetë joshur në Vilia për të takuar një grua përmes një aplikacioni takimesh, por në vend të një takimi, ishte ngritur një kurth i mirëorganizuar.

Autorët e mbajtën peng Halilin për rreth 24 orë, ku e torturuan dhe më pas e qëlluan. Trupi i tij më pas u transportua në Skourta dhe iu vunë flakën brenda makinës. Autoritetet greke vijojnë hetimet për të identifikuar autorët dhe për të sqaruar plotësisht rrethanat e vrasjes.