Kryeministri Edi Rama deklaroi sot se në kryeqytet janë liruar rreth 100 mijë metra katrorë të zaptuar dhe theksoi se aksioni kundër zaptuesve do të vijojë. Ai foli gjatë një diskutimi me banorët e njësisë 2 për buxhetin 2026, duke shpjeguar rëndësinë e kthimit të hapësirave të komunitetit në shërbim të qytetarëve.

“Një pronë nuk mund të zaptohet. Kur ka një leje për shfrytëzim, hapësira është në shërbim të komunitetit. Kur bëhet ndërtim apartamentesh, gjithçka rreth ndërtimit duhet të jetë për komunitetin,” tha Rama, duke shtuar se shpesh hasen vështirësi për shkak të injorancës ose korrupsionit të gjykatësve dhe inspektorëve.

Kryeministri nënvizoi se problematikat lindin kur gjykatës ose inspektorë i japin të drejtë një ndërtuesi në dëm të komunitetit, duke theksuar se në momentin që pronari merr leje, kjo është e drejtë e tij.

Ai theksoi se tashmë janë arritur 100 mijë metra katrorë të liruar dhe se po punohen projekte për t’i kthyer këto hapësira në shërbim të qytetarëve.

“Është detyrë e qeverisë të sigurojë që hapësirat publike të jenë të përdorshme nga komuniteti dhe të mos abuzohet me pronat që i takojnë qytetarëve,” përfundoi Rama.