Banorët e Levanit dhe familjarët po përcjellin sot për në banesën e fundit Dalan Alliaj, 36-vjeçarin që mbeti viktimë e një sulmi me armë zjarri në fshatin Gjorm, Selenicë. Ceremonia pritet të nisë në orën 13:00, ndërsa dyert e mortit janë hapur në banesën e tij.

Viktima, baba i dy fëmijëve dhe pronar i një servisi automjetesh, përshkruhet nga banorët si një njeri model, punëtor dhe korrekt. Një prej banorëve e përshkroi familjen Alliaj si “fisi më punëtor në rruzull”, duke theksuar se çdo gjë e kanë bërë me djersë.

Autori i dyshuar, Bertil Alliaj, kushëriri 32-vjeçar i viktimës, dyshohet se ka kryer vrasjen për një konflikt me motive të dobëta. Gjatë marrjes në pyetje, ai ka deklaruar se e ka kryer aktin “për një arsye të fortë”, të cilën ka refuzuar ta bëjë publike në këtë fazë të hetimit.

Strukturat e policisë dhe prokuroria vijojnë hetimet për zbardhjen e plotë të ngjarjes.