Policia e Fierit ka goditur një sërë rastesh kriminale, ku në qendër të vëmendjes është vendosur arrestimi i një 20-vjeçari, i cili akuzohet se ka përndjekur për katër muaj rresht një vajzë vetëm 17 vjeçe. I riu është identifikuar si Elisjon Buzi, banues në Fier, dhe tashmë do të përballet me akuzën e përndjekjes.

Por ky nuk ishte i vetmi rast që solli ndërhyrjen e forcave të rendit. Specialistët e Qarkullimit Rrugor kapën në flagrancë Xh. T., 30 vjeç, nga Lushnja, teksa drejtonte automjetin në gjendje të dehur, duke rrezikuar sigurinë e qytetarëve.

Gjithashtu, një 15-vjeçar u referua në Prokurori pasi gjatë kontrollit fizik iu gjetën disa doza me lëndë narkotike cannabis sativa, të cilat u sekuestruan nga Policia.

Edhe konfliktet fizike nuk munguan. Në Lushnjë, për motive të dobëta, V. H., 35 vjeç, nga Bulqiza, goditi me grusht një shtetas rus 34-vjeçar. Ndërsa shtetasit G. S., 26 vjeç dhe E. B., 32 vjeç, të dy banues në Lushnjë, u konfliktuan me njëri-tjetrin, duke përfunduar në procedim penal.

Materialet procedurale i janë referuar tashmë Prokurorisë së Fierit, e cila do të vijojë hetimet për secilin rast.