Një 22-vjeçar turk, Burak Ozakyuz, është arrestuar në Fier pasi bleu karburant me kartëmonedha false.

Njoftimi i policisë:

Pas një denoncimi nga një punonjës i një pike karburanti në fshatin Çermë e Sipërme, se një klient kishte paguar me kartëmonedha false (dollarë), Seksioni për Hetimin e Krimeve Ekonomiko-Financiare u vu në lëvizje për të identifikuar dhe ndaluar autorin.

Si rezultat, u kap dhe u arrestua në flagrancë shtetasi B. O., 22 vjeç, banues në Turqi, për veprën penale “Falsifikimi i monedhave”.

Gjatë kontrollit të automjetit që ai e kishte marrë me qira, policia gjeti dhe sekuestroi një kartëmonedhë 100 dollarëshe, e dyshuar si e falsifikuar.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Fier, për veprime të mëtejshme.

Hetimet vijojnë për të zbuluar nëse ka persona të tjerë të përfshirë në këtë aktivitet të paligjshëm.