Prokuroria e Fierit ka përfunduar hetimet dhe ka dërguar për gjykim dosjen ndaj Enea (Ledion) Nebiut dhe Klenis Kazazajt, të akuzuar për tentativën e vrasjes së Orges Buzit, ngjarje e ndodhur më 30 korrik 2023 në lagjen “Sheq i Madh”.
Sipas akuzës, pas një konflikti banal në ambientet e kompleksit “Albes”, Nebiu dhe Kazazaj u larguan me automjetin e tyre, por rreth orës 05:30 të mëngjesit u rikthyen. Në kulmin e debatit të dytë, Enea Nebiu nga brenda makinës tip “Audi A8” hapi zjarr në drejtim të Orges Buzit, duke e plagosur rëndë.
Dy të rinjtë përballen me akuzat për “Vrasje me dashje, mbetur në tentativë”, “Mbajtje pa leje të armëve dhe municioneve”, si dhe “Moskallëzim krimi”. Pas ngjarjes, ata u larguan nga vendi i krimit, por më pas u identifikuan dhe u vunë nën hetim nga organet e drejtësisë.
