Gjykata e Fierit ka miratuar kërkesën për mbrojtje të posaçme për gjyqtarin Vladimir Cjapi dhe familjen e tij, pas kërcënimeve që ai ka marrë. Vendimi u mor nga Këshilli për Mbrojtjen e Magjistratëve pas kërkesës së zv/kryetarit të gjykatës, Noel Veizi.

Në një njoftim për mediat, gjykata dënon aktin kriminal dhe kërkon nga organet e drejtësisë hetimin dhe zbardhjen e plotë të ngjarjes. “Shprehim bindjen se i gjithë opinioni publik ndodhet sot në krah të gjyqtarit Vladimir Cjapi, familjes së tij dhe gjykatës së Fierit”, thuhet në deklaratë.

Ndërkohë, gjatë paradites së të enjtes, forcat speciale kryen një kontroll në banesën e Arben Isufajt, i njohur si “Ben Qimja”, një personazh i njohur i botës së krimit, i dyshuar për kanosjen e gjyqtarit Cjapi. Megjithatë, 55-vjeçari nuk ndodhej në banesë gjatë operacionit policor në Sheq të Madh.

Hetimet mbi këtë çështje vijojnë, ndërsa autoritetet pritet të ndërmarrin masa të mëtejshme për kapjen e personave përgjegjës.