Prokuroria e Fierit ka përfunduar hetimet dhe ka dërguar për gjykim Azgan Mernicën, i cili vitin e kaluar vrau me armë zjarri efektivin e Forcave Speciale “Shqiponja”, Novruz Cenalia.
Sipas hetimeve, konflikti mes viktimës dhe të pandehurit nisi për shkak të një debati mbi mënyrën e drejtimit të automjetit. Azgan Mernica, duke drejtuar makinën me shpejtësi dhe pa kontrolluar rrugën, kishte shkaktuar rrezik për përdoruesit e rrugës. Pas tërheqjes së vëmendjes nga efektivi i policisë, Mernica ka ndaluar automjetin, ka zbritur me një çantë ku mbante armën e zjarrit dhe ka qëlluar me pistoletë në fytyrë viktimën Novruz Cenalia, duke i shkaktuar atij vdekjen e menjëhershme.
Akuzat ndaj autorit
Prokuroria e Fierit ka ngritur ndaj 23-vjeçarit Asllan Mërnica akuzat për:
• “Vrasja e punonjësve të Policisë së Shtetit”,
• “Mbajtja pa leje dhe prodhimi i armëve, armëve shpërthyese dhe i municionit”,
• “Drejtimi i automjeteve në mënyrë të parregullt”,
të parashikuara nga nenet 79/b, 278 prg.I dhe 291 të Kodit Penal.
Si ndodhi vrasja?
Ngjarja ndodhi më 13 maj 2024, në fshatin Baltëz të Fierit. Efektivi Novruz Cenalia, teksa ishte rrugës për në punë, u përfshi në një debat me Azgan Mërnicën për kalimin në një rrugë të ngushtë. 23-vjeçari, i cili ishte i armatosur, nxori pistoletën dhe e qëlloi për vdekje në vend me një plumb në kokë.
Pas krimit, autori u arratis duke u fshehur për 48 orë, ndërsa më pas vendosi të vetëdorëzohej pas negociatave me familjarët. Ai rrëfeu se ishte fshehur nëpër kanale dhe se ishte kthyer në shtëpinë e dajës së tij para se të dorëzohej në polici.
Prokuroria: Angazhim maksimal për drejtësi
Prokuroria e Fierit ka theksuar se do të vijojë hetimet e shpejta dhe të plota për të garantuar drejtësi dhe për të vënë para ligjit personat që kryejnë krime kundër jetës dhe autoritetit të shtetit.
