Policia e Fierit ka finalizuar me sukses operacionin antikanabis të koduar “Led”, duke zbuluar një ambient të përshtatur për kultivim të bimëve narkotike brenda një banese në fshatin Vadhizë. Në pranga kanë rënë pronari i banesës, 63-vjeçari I.G., dhe një punonjës i OSHEE-së, 61-vjeçari R.M., i dyshuar për shpërdorim detyre.

Sipas hetimeve, banesa ishte përshtatur me pajisje elektrike si llamba, aspiratorë, ventilatorë dhe panele për ngrohje dhe ndriçim, duke u furnizuar në mënyrë të paligjshme me energji elektrike, një fakt që punonjësi i OSHEE-së dyshohet se e ka neglizhuar qëllimisht.

Nga kontrolli i banesës, policia sekuestroi:
• 41 bimë narkotike Cannabis Sativa
• 57 fidanë kanabisi
• Një sasi e kanabisit të përpunuar
• 784 fara kanabisi
• 5 panele elektrike
• 8 llamba për ndriçim dhe ngrohje
• 2 filtra ajrimi
• 3 ventilatorë freskues
• 2 aspiratorë
• 18 pajisje të tjera elektrike për kultivim

Operacioni u zhvillua nga Seksioni për Hetimin e Narkotikëve në bashkëpunim me Komisariatin e Policisë Fier, pas informacioneve të siguruara në rrugë operative dhe veprimeve të shpejta hetimore.

Materialet procedurale janë referuar në Prokurorinë pranë Gjykatës së Shkallës së Parë të Juridiksionit të Përgjithshëm Fier, ku vijojnë hetimet për zbardhjen e plotë të rrjetit të përfshirë në veprimtarinë e paligjshme.