Tiranë – Policia ka finalizuar me sukses operacionin e koduar “Njësia”, një aksion i koordinuar mes Seksionit kundër Krimeve Ekonomike të DVP Tiranë, Drejtorisë së Forcës së Posaçme Operacionale të DPPSh-së, Njësisë së Përbashkët të Investigimit me SHBA-në dhe Prokurorisë së Tiranës.

Si rezultat, u godit një grup i strukturuar kriminal me pjesëtarë nga Shqipëria dhe Kosova, që falsifikonte dokumente me qëllim shitjen e tyre për individë që synonin të lëviznin ilegalisht drejt vendeve që kërkojnë viza.

Arrestime dhe sekuestrime

Në kuadër të këtij operacioni, 6 shtetas u vunë në pranga, konkretisht:
•K. D., 35 vjeç, banues në Tiranë
•K. G., 57 vjeç, banues në Prizren
•G. L., 28 vjeç, banues në Kaçanik
Gjithashtu, u ndaluan me iniciativë:
•K. D., 56 vjeç, banues në Tiranë
•L. B., 58 vjeç, banues në Tiranë
•E. D., 20 vjeçe, banuese në Tiranë

Gjatë operacionit u sekuestruan 15 dokumente të dyshuara si të falsifikuara, duke përfshirë:
•3 pasaporta dhe 3 karta identiteti amerikane
•2 pasaporta, 2 karta identiteti dhe 1 leje drejtimi italiane
•1 pasaportë dhe 1 leje drejtimi angleze
•1 leje drejtimi rumune
•1 kartë identiteti shqiptare
Po ashtu, u konfiskuan 7 celularë dhe 1 motomjet.

Akuzat dhe veprimet e mëtejshme

Materialet procedurale i janë referuar Prokurorisë së Tiranës për veprime të mëtejshme, për akuzat:

“Falsifikimi i dokumenteve”
“Falsifikimi i letërnjoftimeve, i pasaportave ose i vizave”
“Ndihma për kalim të paligjshëm të kufijve”

Policia dhe institucionet partnere vijojnë hetimet për të identifikuar dhe ndaluar persona të tjerë të përfshirë në këtë rrjet kriminal.