Një skandal korrupsioni trondit Komisionin e Prokurimeve Publike, pas zbardhjes së përgjimeve që implikojnë drejtpërdrejt kreun e këtij institucioni, Jonaid Myzyri, në një aferë tenderimi prej 2.3 milionë eurosh për mirëmbajtjen e një segmenti rrugor në veri të vendit.

Hetimet e SPAK nisën pas dyshimeve se Myzyri kishte ndikuar në mënyrë të paligjshme në vendimmarrjet e KPP-së lidhur me ankesat për tenderin e rrugës “Rrëshen (Ura e Fanit) – Shpal – Ura e Repsit”. Një element kyç në hetim u bë punonjësja Lindita Skeja, e cila, përmes një përgjimi të zbardhur, pranon rolin e saj në skemën abuzive dhe shprehet se ka firmosur dokumentet pa asnjë verifikim, duke zbuluar një mekanizëm të mirëstrukturuar ku vartësit firmosin, ndërsa përfitimet shkojnë te drejtuesit.

“Vajta i shërbeva si qeni. Firmosim ne, të gjithë si delet… E lekët i marrin ata,” dëgjohet të thotë Skeja në një bisedë të përgjuar nga SPAK.

Prokuroria e Posaçme evidenton se këto komunikime dëshmojnë për një ndikim të drejtpërdrejtë të Myzyrit në procedura të dyshimta prokurimi, ku firmat e punonjësve përdoren si mbulesë për vendime të diktuara nga lart.

Në kërkesën për masë sigurie ndaj tij, prokurori Elvin Gogaj thekson se ekziston rreziku i cenimit të provave, rreziku i arratisjes, si dhe mundësia për kryerje të veprave të tjera penale, ndërkohë që Myzyri ndodhet aktualisht nën masën e “detyrimit për paraqitje” nga GJKKO.

SPAK ka zgjeruar hetimet edhe për tenderët e zhvilluar gjatë periudhës 2020–2023, ku dyshohet se procedurat janë manipuluar në favor të kompanive të caktuara, shpeshherë pa garë reale dhe me eliminim të qëllimshëm të operatorëve konkurrues.

Jonaid Myzyri u emërua në krye të KPP-së në vitin 2020 për një mandat 5-vjeçar, me propozim të qeverisë dhe votim në Kuvend. Afera e fundit vë në pikëpyetje integritetin e institucionit që ka për detyrë të garantojë barazinë dhe transparencën në përdorimin e fondeve publike.