Tiranë – Ministria e Mbrojtjes njoftoi sot se efektivët e Forcave të Armatosura, së bashku me ekipet lokale të zjarrfikësve, po luftojnë flakët e një vatre të papritur, përhapja e së cilës është favorizuar nga erërat e forta.
Në terren ndodhet edhe ministri i Mbrojtjes, Pirro Vengu, i cili po monitoron nga afër situatën dhe koordinon ndërhyrjen e forcave.
Sipas Ministrisë, gjatë 24 orëve të fundit janë evidentuar 64 vatra zjarri, nga të cilat 24 janë ende aktive. Mbi 10 mijë forca emergjencash, nën koordinimin e Agjencisë së Mbrojtjes Civile, ndodhen në terren, ndërsa situata po shkon drejt stabilizimit.
Operacioni kundër zjarreve ka vijuar pa ndërprerje gjatë gjithë natës, me synim kufizimin e përhapjes së flakëve pranë zonave të banuara dhe parqeve kombëtare në të gjithë vendin. Nga ajri po operojnë tre helikopterë në Gramsh dhe dy të tjerë në Delvinë, për të mbështetur ekipet në terren.
