Forcat speciale, ato të burgjeve, madje edhe snajperistë do të shoqërojnë eskortën e Emiliano Shullazit sot drejt ambienteve të Spitalit Shtetëror Nënë Tereza, ku i dënuari i regjimit të posaçëm 41 biss, do t’i nënshtrohet një ndëryrje kirurgjikale.

Mësohet se shoqërimi i të dënuarit do të kryhet në orën 10:00 të së premtes nga ambientet e burgut 41 BiSs drejt spitalit “Nënë Tereza” dhe ku policia do të qëndrojë në gatishmëri numër një.

Rreth dy javë më parë, ai u dërgua me urgjencë drejt një spitali privat në Tiranë ku kreu disa analiza të nevojshme që përcaktonin gjëndjen e tij jo të mirë shëndetësore. Shullazi mësohet se është diagnostikuar me një sëmundje të rëndë, e cila mund t’i rrezikojë edhe jetën, shkruan mcn.

Me gjithë insistimin e avokatit që ndëryrja kururgjikale ndaj klientit të tij të kryhej në një spital privat, Drejtoria e Burgjeve i ka refuzuar të gjitha opsionet e servirura duke pranuar vetëm varjanin e një operimi të Shullazit, në spitalin publik shtetëror.

Fakti që në këtë shoqërim të tij nga forca të shumta policore do të përfshihen edhe snajperistë, lidhet edhe me dyshimet e një atentati apo arratisje të tij. Në janar të 2015 Shullazi i shpëtoi një atentati pranë Rugës së Kavajës në Tiranë.

Ai do të arrestohej një vit më pas, në prill të 2016, me urdhër të Prokurorisë së Krimeve të Rënda, si i dyshuar për “pjesëmarrje në grupe të strukturuara kriminale” dhe vrasje. Ndaj tij pritet të kërkohet edhe dënimi me burgim të përjetshëm.