Portugezi Ruben Saraiva, i akuzuar për ekzekutimin e biznesmenit Ardian Nikulaj në Shëngjin më 19 Prill, pritet të ekstradohet në Shqipëri më 31 dhjetor. Përfaqësues të Policisë së Shtetit dhe Interpolit Shqiptar janë në Marok, ndërsa operacioni për paraqitjen para drejtësisë së Saraivës është në fazën e përfundimit.

Burime të besueshme njoftojnë se Saraiva është marrë në pyetje nga autoritetet shqiptare, megjithatë, detajet mbi deklaratat e tij ende nuk janë bërë publike. Vendimi për ekstradimin është marrë nga Gjykata e Marokut rreth 10 ditë më parë dhe për këtë ka ndërhyrë edhe Interpol, agjencia që ka bashkëpunuar me autoritetet shqiptare për lokalizimin dhe kapjen e Saraivës në Marok 7 muaj më parë.

Në lidhje me vrasjen e Nikulajt, janë arrestuar në Angli 3 shtetas britanikë dhe Edmond Haxhia si personi që kishte porositur vrasjen. Autoritetet shqiptare kanë dërguar një kërkesë për ekstradim të tyre nga Britania në Shqipëri. Ky rast i tronditshëm lidhet me një zinxhir hakmarrjeje ndërmjet familjeve në qytetin e Lezhës, duke shkaktuar shumë viktima në kalimin e viteve.