Franca dhe Italia kanë përcjellë urime zyrtare për Kosovën me rastin e 18-vjetorit të Pavarësisë.

Sipas njoftimit të Presidencës së Kosovës, Vjosa Osmani ka pranuar letra urimi nga Emmanuel Macron dhe Sergio Mattarella, të cilët kanë shprehur përgëzimet e tyre për këtë përvjetor.

Më herët, presidentja Osmani kishte marrë një mesazh urimi edhe nga Charles III.

Në letrat e tyre, liderët kanë përcjellë urimet më të përzemërta për Presidenten dhe qytetarët e Kosovës, duke theksuar përkushtimin për thellimin e marrëdhënieve dypalëshe, mbështetjen për integrimin euroatlantik të Kosovës, si dhe angazhimin për paqen, stabilitetin dhe prosperitetin në rajon.

Presidenca bëri të ditur se mesazhet e urimit janë pjesë e letrave të shumta që krerë shtetesh dhe qeverish nga vende të ndryshme të botës i kanë dërguar Kosovës me rastin e Ditës së Pavarësisë.