Franca ndodhet në një moment të tensionuar politik, ndërsa kryeministri François Bayrou përballet me rrezikun e rrëzimit të qeverisë së tij gjatë një vote besimi më 8 shtator. Bayrou ka kërkuar miratimin e parlamentit për planet e tij të shkurtimeve të shpenzimeve, që synojnë të kursen 44 miliardë euro në vit, për të stabilizuar financat publike të vendit.

“Përballemi me një rrezik të menjëhershëm që duhet ta adresojmë… përndryshe nuk kemi të ardhme,” deklaroi Bayrou, duke theksuar rëndësinë e votës për të përcaktuar rrugën që Franca duhet të ndjekë për të përballuar borxhin e madh shtetëror. Ai shtoi se “Ka momente kur vetëm një rrezik i llogaritur mund të na shpëtojë nga një rrezik më i madh.”

Megjithatë, opozita duket e vendosur për të mos e mbështetur qeverinë. Jordan Bardella nga partia e ekstremit të djathtë Rassemblement National deklaroi se partia e tij “nuk do të votojë kurrë për një qeveri që po i bën francezët të vuajnë”. Deputetët e La France Insoumise (LFI), si dhe partitë Gjelbër dhe Komuniste, kanë konfirmuar se do të votojnë kundër. Lideri i Socialistëve, Olivier Faure, tha se është e papranueshme që PS apo ndonjë parti tjetër opozitare të mbështesë qeverinë.

Bayrou pranoi se vota është një bast i madh: “Po, është e rrezikshme – por është edhe më e rrezikshme të mos bësh asgjë,” duke kujtuar se deficit i buxhetit të Francës arriti 5.8% të PBB-së vitin e kaluar, pothuajse dy herë më shumë se kufiri i BE-së prej 3%.

Nëse qeveria rrëzohet, opozita ka paralajmëruar shpërndarjen e parlamentit dhe organizimin e zgjedhjeve të parakohshme, ndërsa presidenti Emmanuel Macron pritet të përpiqet të shmangë një situatë të tillë dhe të emërojë një kryeministër të ri.

Ky moment politik vendimtar duket se do të përcaktojë fatin e qeverisë dhe kursin ekonomik të Francës për vitet e ardhshme.