Autoritetet franceze kanë sekuestruar sot një nga ngarkesat më të mëdha të lëndëve narkotike në historinë e vendit. Më shumë se 2 tonë kokainë, me një vlerë të përafërt prej 130 milionë eurosh, u kapën në portin strategjik të Le Havre.

Policia ka vënë në pranga dy persona të dyshuar për përfshirje në këtë trafik ndërkombëtar droge. Ky operacion i suksesshëm vjen në kuadër të përpjekjeve të përforcuara të autoriteteve franceze për të goditur rrjetet e trafikut të drogës.

Kryeministri i ri i Francës, François Bayrou, dhe Ministri i Brendshëm, Bruno Retailleau, kanë theksuar rëndësinë e forcimit të masave kundër bandave kriminale dhe kanë premtuar veprime të mëtejshme për të parandaluar trafikimin dhe shpërndarjen e lëndëve narkotike.

Ky operacion është pjesë e një inisiative më të gjerë të Bashkimit Europian, e cila synon të luftojë trafikun e drogës përmes bashkëpunimit me autoritetet portuale të qyteteve kyçe në Evropë. Lufta kundër rrjeteve kriminale mbetet një përparësi për autoritetet franceze dhe europiane, ndërsa portet vazhdojnë të jenë pika të nxehta për trafikun ndërkombëtar të drogës.