Një rast tronditës abuzimi me një të mitur është zbuluar në Francën lindore, ku një djalë 9-vjeçar u gjet i mbyllur në një furgon, ku dyshohet se ishte mbajtur për më shumë se një vit nga babai i tij.

Sipas mediave të huaja, fëmija u zbulua pas denoncimeve të fqinjëve, të cilët kishin dëgjuar zhurma që vinin nga automjeti i parkuar. Në momentin e ndërhyrjes, policia e gjeti të miturin në gjendje të rëndë fizike, me shenja të theksuara kequshqyerjeje dhe i paaftë për të ecur si pasojë e izolimit të gjatë.

Burimet bëjnë me dije se djali jetonte në kushte çnjerëzore, i detyruar të qëndronte i mbyllur brenda automjetit pa akses në kushte minimale higjieno-sanitare. Ai u ka treguar autoriteteve se nuk lejohej të dilte as për nevoja bazë dhe se kishte kohë të gjatë pa u larë.

Hetimet paraprake tregojnë se babai 43-vjeçar e vizitonte furgonin disa herë në ditë, duke i çuar ushqim dhe ujë. Ai ka pretenduar se veproi në këtë mënyrë për të shmangur dërgimin e fëmijës në një institucion psikiatrik, me kërkesë të partneres së tij.

Megjithatë, prokuroria ka theksuar se nuk ka pasur asnjë indicie që i mituri të vuante nga probleme të shëndetit mendor dhe se para zhdukjes kishte rezultate shumë të mira në shkollë.

Babai është arrestuar dhe përballet me akuza të rënda, përfshirë rrëmbim, heqje të paligjshme të lirisë dhe neglizhencë të rëndë ndaj një të mituri. Ndërkohë, partnerja e tij po hetohet për moskallëzim të krimit.

Dy fëmijët e tjerë të familjes janë marrë në mbrojtje nga autoritetet, ndërsa 9-vjeçari ndodhet nën kujdes mjekësor dhe psikologjik.