Pas një vere pa pagesë, Tuneli i Llogarasë do të nisë aplikimin e tarifës për qarkullim duke filluar nga 15 shtatori. Çdo automjet do të duhet të paguajë 10 euro vajtje-ardhje, sipas vendimit të marrë nga autoritetet.

Tuneli, me një gjatësi 5.9 kilometra, ka shndërruar udhëtimin nga Dukati drejt Palasës, duke e shkurtuar kohën e përshkimit në vetëm 7 minuta, nga 45 minuta që duheshin më parë përmes Qafës së Llogarasë.

Projekti përfshin dy tunele, ku njëri shërben si tunel emergjence, por autoritetet kanë parashikuar që në rast të rritjes së fluksit turistik, të dyja të përdoren për qarkullim.

Menaxhimi i vetëpagesave do të kryhet nga Enti Kombëtar i Operimit Rrugor (EKOR), një shoqëri aksionere me kapital shtetëror nën varësinë e Ministrisë së Infrastrukturës dhe Energjisë. EKOR do të administrojë mirëmbajtjen e portave automatike, sistemin e tarifimit, shpërndarjen e biletave dhe abonimeve mujore për përdoruesit e shpeshtë.

Aktualisht, në Shqipëri janë tre segmente rrugore me pagesë: Milot–Morinë, Thumanë–Kashar dhe Dukat–Palasë, ku përfshihet edhe Tuneli i Llogarasë.