Një aksident i rëndë është regjistruar mbrëmjen e sotme në hyrje të qytetit të Fushë-Arrëzit, ku një automjet ka dalë nga rruga dhe është përplasur me një lokal.

Nga përplasja janë plagosur tre gra, përfshirë pronaren e lokalit, F. B., e cila ndodhej jashtë ambienteve të tij në momentin e ngjarjes, si dhe dy gra të tjera që ndodheshin ulur në një tavolinë.

Të plagosurat janë transportuar menjëherë drejt Spitalit të Pukës, ku po marrin ndihmën e parë mjekësore. Sipas burimeve zyrtare, ato ndodhen jashtë rrezikut për jetën.

Ndërkohë, drejtuesi i automjetit, i identifikuar si F. R., është shoqëruar në ambientet e Policisë për t’u marrë në pyetje në lidhje me rrethanat e aksidentit. Paraprakisht dyshohet se ai ka humbur kontrollin e mjetit për shkak të shpejtësisë së lartë.

Grupi hetimor ndodhet në vendngjarje dhe po punon për zbardhjen e plotë të rrethanave të aksidentit.