Kreu i Grupit të PD-së, Gazment Bardhi, në një diskutim në Kuvend lidhur me projektrezolutën e PS për anti-korrupsionin, akuzoi kryeministrin Edi Rama si arkitektin e kriminalizimit të institucioneve. Bardhi theksoi se pavarësisht pranimit të vonuar nga Rama për nevojën e një përpjekjeje kundër korrupsionit, kjo nuk është e besueshme duke pasur parasysh historinë e tij të mbrojtjes së praktikave korruptive.
“Vetëm pellazgët dhe ilirët mbetën pa u fajësuar për korrupsionin e qeverisë së Edi Ramës, për dështimet, për premtimet e pambajtura, për shpopullimin dhe mohimin e të drejtave të atyre që shpërnguli përgjatë qeverisjes së tij nga vendlindja,” tha Bardhi.
Ai theksoi se lufta ndaj korrupsionit kërkon veprime konkrete dhe jo vetëm fjalë apo rezoluta. Sipas tij, qeveria e Ramës ka treguar mungesë të vullnetit për të luftuar korrupsionin, duke mbrojtur afera të shumta korruptive, përfshirë inceneratorët, kontratat në sektorin e shëndetësisë, dhe korrupsionin në Policinë e Shtetit dhe Bashkinë e Tiranës.
Grupi Parlamentar i PD ka mbështetur dhe mbështet fuqimisht luftën ndaj korrupsionit, mirëqeverisjen dhe shtetin ligjor. Jemi ne që kemi bërë 11 vite betejë për këtë, me qeverinë më të korruptuar të këtyre 34 viteve, më e korruptuara në Rajon e Europë.
· Jemi ne që kemi denoncuar me fakte aferën korruptive të inceneratorëve. Edi Rama i doli në mbrojtje.
· Jemi ne që kemi denoncuar aferën me kontratat korruptive në sektorin e shëndetësisë. Edi Rama i doli në mbrojtje.
· Jemi ne që kemi denoncuar korrupsionin në Bashkinë e Tiranës. Edi Rama i doli në mbrojtje.
· Jemi ne që kemi denoncuar korrupsionin në Policinë e Shtetit që solli kanabizimin e vendit. Edi Rama i doli në mbrojtje.
· Jemi ne që luftojmë për tolerancë zero ndaj korrupsionit zgjedhor. Edi Rama është arkitekti i tij.
· Jemi ne që luftojmë kundër qeverisjes dhe fuqizimit nga qeverisja të krimit të organizuar, si mundësia e vetme që lejon mirëqeverisjen dhe respektin ndaj shtetit ligjor. Edi Rama është arkitekti i kriminalizimit të institucioneve, duke vënë në rrezik serioz funksionimim demokratik të institucioneve publike.
Të luftosh korrupsionin nuk ka nevojë as për fjalë dhe as për rezoluta. Ka nevojë për akte, për veprime. Edi Rama kishte 11 vite kohë të na tregonte të paktën një akt, një veprim, që ka vullnet për të luftuar korrupsionin, ka vullnet për të mirëqeverisur, ka vullnet për të respektuar shtetin ligjor.
