Kreu i grupit parlamentar të Partisë Demokratike, Gazment Bardhi, u paraqit sot në ambientet e SPAK (Prokuroria e Posaçme) për të dëshmuar në lidhje me disa shantazhe që i janë bërë përmes e-mailit. Bardhi mbërriti në prokurori rreth mesditës, por gjatë këtij procesi ndodhi një incident. Makina që e solli në SPAK aksidentalisht përplasi një motorist që po kalonte rrugën.
Pas daljes nga SPAK, Bardhi iu drejtua mediave duke sqaruar situatën dhe duke mohuar kategorikisht vërtetësinë e mesazheve shantazhuese që i ishin dërguar në telefonin e tij.
Bardhi deklaroi:
“Nuk bëhet fjalë për asnjë përgjim real. Ato janë prodhuar me qëllim kriminal për të shantazhuar një deputet. Kam dijeni që e njëjta gjë ka ndodhur edhe me persona të tjerë. Sapo jam njohur me këto mesazhe, kam njoftuar menjëherë SPAK-un. Është e konfirmuar se ai format nuk ekziston në përgjimet zyrtare të Sky Ecc që disponon Prokuroria e Posaçme.”
Ai gjithashtu shtoi se po mbledh të dhëna për mediat që i publikojnë këto mesazhe si të vërteta, duke i akuzuar për përfshirje në një skemë shantazhi ndaj tij si deputet. Sipas tij, mesazhet janë të fabrikuara me qëllime kriminale nga individë të lidhur me krimin e organizuar ose nga zyrtarë të lartë që dalin realisht në përgjimet e Sky Ecc.
Bardhi njoftoi se SPAK ka nisur hetimet për të identifikuar burimin e mesazheve dhe e ka vënë telefonin e tij në dispozicion të hetimeve, duke theksuar se askush nuk mund të guxojë të sajojë të dhëna të rreme për të.
