Kryetarja e Kuvendit Lindita Nikolla ka përjashtuar nga seanca deputetin e PD, Gazment Bardhi pas tensioneve të krijuara në lidhje me interpelancën e kërkuar me kryeministrin Edi Rama.

Kjo pasi deputetët e PD kanë bllokuar Foltoren ndërsa deputeti Bardhi u afrua pranë ministrit Peleshi, ku tentoi ti hiqte mikrofonin.

Gazment Bardhi: Procedurë është. Kjo seancë ka një orë që është marrë peng nga kryeministri Edi Rama.

Ju duhet të ngriheni në lartësinë e detyrës.

Rama mos fshihet pas Twitter, nëse ka gjëra për të thënë lidhur me këtë, të vijë.

Nikolla i heq fjalën: As kjo nuk është për procedurë. Konsiderohet që jeni tërhequr nga interpelanca, nuk pranoni ta zhvilloni me zonjën Spiropali. Nuk ua jap fjalën, ua dhashë. Nuk pranoni të zhvilloni interpelancën, nuk ka pse ta marrësh më fjalën. E sqaruat qendrimin tuaj mëse një herë. Vijojmë me pikën tjetër të rëndit të ditës.

Deputetët e opozitës i bien tavolinave: Turp, turp.

Nikolla i jep fjalën ministrit Niko Peleshi: Kryeministri ka deleguar, e sqaruarm, nuk mund të rrimë gjithë ditën duke të sqaruar ty, nuk ke dëshirë të vazhdosh normalisht Kuvendin.

Bardhi afrohet tek ministri Peleshi dhe tenton ti heq mikrofonin, Garda e pengon.

Nikolla: Ju tërheq vërejtjen, jeni i përjashtuar nga seanca plenare kaq.