Avokati i Sali Berishës, Genc Gjokutaj, ka deklaruar se gjyqi ndaj liderit të Partisë Demokratike do të zhvillohet me dyer të hapura dhe ka ironizuar provat e paraqitura nga SPAK, duke i cilësuar ato si të pavlefshme dhe qesharake. I ftuar në një emision televiziv, Gjokutaj tha se publiku do të shohë “gallatë”, për shkak të dëshmive kontradiktore dhe të pabazuara në fakte.

“Do të caktohet një datë. Gjyqi do të jetë me dyer të hapura. Do të shikoni gallatë të madhe me dëshmitarë që do të thonë se u ofrua një favor, por që nuk e mbajnë mend se nga kush. Këto janë të gjitha të pavlefshme. Po nuk vure gishtin, ajo dëshmi nuk merret fare në konsideratë,” – u shpreh Gjokutaj.

Akuza për prapavijë politike dhe mungesë integriteti

Sipas tij, çështja është e motivuar politikisht dhe po përdoret si mjet për të goditur opozitën në një kohë të ndjeshme politike. Ai ngriti dyshime edhe mbi integritetin e gjyqtarëve, duke thënë se:

“Gjyqtarët nuk janë përfolur për integritet. Në vendimet kolegjiale janë më të mbrojtur, por kjo çështje është çuar me dhunë në gjyq.”

Gjokutaj gjithashtu vuri në dukje se ka një kalendar të dukshëm politik, duke akuzuar SPAK-un se përdor arrestime apo thirrje për figura nga Partia Socialiste në të njëjtën ditë me zhvillimet gjyqësore ndaj Berishës, për të krijuar “perceptimin e barazisë” në sytë e publikut.

“Kur Sali Berisha kishte paraqitjen, sillnin edhe një të PS-së nga SPAK-u, për të krijuar perceptimin e barazisë,” tha ai.