Policia e Kukësit ka goditur një tjetër rast të tentativës për kultivim të bimëve narkotike në kuadër të operacionit kombëtar anti-kanabis të koduar “Koordinata”, duke arrestuar një 60-vjeçar dhe shpallur në kërkim vëllain e tij, si bashkëpunëtor në këtë aktivitet të paligjshëm.

Gjatë kontrolleve nga toka dhe ajri me dronë, në fshatin Mgullë, në pronën e shtetasve Q. P. dhe P. P., u zbuluan 29 kubikë me fidanë të dyshuar të llojit Cannabis Sativa.

Si rezultat i veprimeve hetimore:
• Q. P., 60 vjeç, është arrestuar në flagrancë;
• P. P., vëllai i tij, është shpallur në kërkim;
• Ndërkohë, është proceduar penalisht në gjendje të lirë kryeplaku i fshatit, shtetasi K. Ç., me akuzën “Shpërdorim detyre”, pasi dyshohet se ka neglizhuar detyrat ligjore për parandalimin e kultivimit të bimëve narkotike.

Operacioni është pjesë e aksionit të përforcuar të policisë për të parandaluar dhe goditur në mënyrë të hershme kultivimin e drogës, një prioritet i shpallur për sezonin e verës në të gjithë vendin.

Policia e Kukësit deklaron se kontrollet do të vijojnë pa ndërprerje dhe fton qytetarët të raportojnë çdo aktivitet të paligjshëm përmes numrit falas 112 ose aplikacionit Komisariati Dixhital, duke garantuar anonimat dhe reagim të menjëhershëm.