Giorgia Meloni ka zyrtarisht shpallur kandidaturën e saj në zgjedhjet evropiane të qershorit të ardhshëm. Lajmin e bëri të ditur gjatë një konference të partisë së saj, “Fratelli d’Italia”, në Pescara.

“Kam vendosur të angazhohem për të drejtuar listat e “Fratelli d’Italia” në të gjitha zonat zgjedhore”, deklaroi Meloni.

Gjatë fjalimit në skenë, Meloni u kujtua sfidave të mëparshme elektorale evropiane, duke përmendur vitin 2014, kur partia nuk arriti kuorumin prej 4 për qind, dhe ato të vitit 2019, kur arriti 6.5 për qind.

“Në gjashtë vite, jemi rritur me dy për qind, ndërsa në tre të fundit kemi arritur në 26.5 për qind”, tha Meloni.

“Nuk e mbaj këtë histori si një ushtrim retorik vetëkënaqësie…. e them për t’i kujtuar vetes dhe të gjithëve se ajo që kemi fituar nuk është diçka që e kemi përjetësuar përgjithmonë, duhet të vazhdojmë ta meritojmë,” shtoi Meloni.

Kryetarja e “Fratelli d’Italia” theksoi se e ktheu Italinë në qendër të Evropës dhe politikës ndërkombëtare, duke arritur të sjellë Papën në G7 e ardhshëm në Pulia për herë të parë. Më pas, ajo sulmoi opozitën, duke kritikuar simbolet e zgjedhjeve elektorale të Partisë Demokratike dhe Lëvizjes 5 Yjet, të cilat kjo e fundit ka futur në logo, fjalën “paqe”.

“Fratelli d’Italia” kishte gjashtë deputetë në legjislaturën IX të Parlamentit Europian, të cilët i përkisnin grupit të Konservatorëve dhe Reformistëve Europianë (ECR).

Sipas sondazheve, partia e Melonit mund të marrë deri në 24 vende në zgjedhjet e ardhshme në qershor, duke arritur në 27 për qind të votave.