Nga data 9 deri më 11 maj 2025, Giro d’Italia, një nga garat më të njohura të çiklizmit në Evropë, do të nisë për herë të parë nga Shqipëria. Ky event i madh sportiv do të përfshijë tre etapa në qytetet e Durrësit, Tiranës dhe Vlorës, ku 180 çiklistë profesionistë nga e gjithë bota do të konkurrojnë në rrugët shqiptare, duke bashkuar bukurinë natyrore dhe adrenalinën e garës.
Gara do të startojë më 9 maj në Sheshin “Skënderbej” në Tiranë, në orën 13:00, dhe do të vijojë përmes një itinerari që përfundon në Sheshin “Nënë Tereza”, ku çiklistët pritet të mbërrijnë rreth orës 18:00.
Për të siguruar një organizim të suksesshëm, Bashkia e Tiranës, në bashkëpunim me Policinë Bashkiake dhe Policinë e Shtetit, kanë hartuar një plan masash për mbarëvajtjen e aktiviteteve. Ky plan ka të bëjë gjithashtu me ndryshimin e qarkullimit të automjeteve, për të siguruar sigurinë dhe fluiditetin e trafikut gjatë ditëve të garës.
Përkohësisht, do të jenë të mbyllura disa rrugë të rëndësishme të Tiranës, duke përfshirë:
– Rruga SH3 (nga fshati Gracen deri në rrethrrotullimin Teg)
– Rrethrrotullimi Teg deri te rrethrrotullimi Sauk
– Rruga e Elbasanit, Blv. Bajram Curri, rruga Ali Shefqeti, rruga Alajdin Frashëri
– Rruga Rexhekrit, rruga SH54 – Unaza Madhe, rruga Sotir Çaci
– Rruga Xhanfize Keko, rruga Arkitekt Kasemi, Blv. Zhan D’Ark, dhe Blv. Dëshmorët e Kombit
Ky event i madh pritet të sjellë jo vetëm emocion dhe entuziazëm, por gjithashtu do të rrisë edhe vëmendjen ndërkombëtare për turizmin dhe infrastrukturën shqiptare.
