Nënkryetari i Partisë Demokratike, Agron Gjekmarkaj, ka shpallur një qëndrim të fortë ndaj planit për të arrestuar liderin e opozitës, Sali Berisha, dhe deputetin Ervin Salianji. Gjekmarkaj, në një deklaratë për mediat pas përfundimit të seancës parlamentare, theksoi se opozita është në një gjendje agresioni për t’u zhdukur, dhe se ata nuk do ta pranojnë këtë plan ogurzi.

Ai i bëri thirrje të gjithë shqiptarëve të bashkohen në protestën e opozitës më 7 tetor, duke theksuar se është koha për të mbrojtur liritë dhe pluralizmin në vend. “Ne nuk jemi të gatshëm të dorëzojmë liritë, pluralizimin. Nuk pranojmë planin ogurzi për shpërbërjen e opozitës që ka filluar me arrestimin e Berishës ose të Ervin Salianjit. Shqiptarët, ditën e hënë, më 7, në orën 18:00, do të jemi në rrugë për të mbrojtur pluralizmin, demokracinë dhe opozitën që është nën agresion për t’u zhbërë me qëllim që në Shqipëri të jetë vetëm një person,” deklaroi Gjekmarkaj.

Kjo protestë e paralajmëruar pritet të jetë një shprehje e fuqishme e opozitës përballë një situate politike që ata e konsiderojnë si kërcënim për demokracinë në Shqipëri.