Gjermania ka hyrë në negociata të avancuara me Shtetet e Bashkuara për të blerë sisteme mbrojtëse raketore Patriot, me qëllim që ato të dërgohen në Ukrainë, në kuadër të përpjekjeve të vazhdueshme për të forcuar mbrojtjen ajrore të vendit të goditur nga lufta.

Lajmi u konfirmua nga zëdhënësi i qeverisë gjermane, Steffen Cornelius, i cili në një konferencë për shtyp u shpreh:

“Ka mënyra të ndryshme për të plotësuar këto boshllëqe me Patriotët. Ju përmendët njërën prej tyre,” – duke iu referuar opsionit të blerjes nga SHBA.

Cornelius theksoi se bisedimet janë në një fazë intensive, dhe se qeveria gjermane është shumë e shqetësuar për pezullimin e mundshëm të furnizimeve me armë nga SHBA, gjë që mund të cenojë gatishmërinë mbrojtëse të Ukrainës në një moment kyç të luftës.

Negociatat për blerjen e sistemeve Patriot vijnë pas kërkesave të përsëritura të Kievit për forcimin e mbrojtjes kundërajrore, ndërsa Rusia ka shtuar sulmet ndaj infrastrukturës civile dhe ushtarake.

Gjermania ka qenë një nga mbështetësit kryesorë të Ukrainës në Evropë, duke dhënë ndihmë ushtarake dhe financiare që prej nisjes së agresionit rus në shkurt të vitit 2022. Nëse marrëveshja për Patriot-ët finalizohet, ajo do të përbënte një hap tjetër të rëndësishëm në bashkëpunimin transatlantik për sigurinë e Evropës Lindore.