Gazetari nga Kosova, Labinot Nimani, i ftuar në emisionin “Live From Tirana”, zbuloi detaje mbi arrestimin e Gjestit dhe incidentin e ndodhur në zyrat e kompanisë Onima.

Për kontratën e Gjestit, Nimani tha: “Në fakt nuk e di ekzaktësisht sepse nuk e kam parë dokumentacionin, por zakonisht këto kontrata zgjasin nga pesë deri në dhjetë vjet. Kështu që besoj se është akoma brenda asaj kontrate të cilën e ka firmosur me plot vetëdije dhe me dëshirën e tij. E cila zgjat në fakt deri në vitin 2028.”

Ai përshkroi momentin e incidentit: “Mendoj që dhuna dhe kërcënimi nuk janë format e duhur për të marrë atë që do. Unë me sa kam arritur të kuptoj Gjesti ka krijuar një situatë të pazakontë dhe shumë të tmerrshme dhe për punonjësit e Onima-s kur ka shkuar atë ditë sepse ka shkuar me revole në duar duke e kërkuar numrin 1 të kësaj kompanie, personin me inicialet E. SH., dhe duke shkaktuar kështu një kaos total në zyrat e kompanisë. Ka përdorur një gjuhë të vrazhdë dhe policia kur ka ardhur e ka gjetur me revole në duar.”

Sa i përket pronarit të Onima-s, Nimani shtoi: “Me shumë gjasë jo, sepse nëse nuk gaboj ai nuk ka qenë aty në ato momente që Gjesti ka shkuar.”

Incidenti ka krijuar një situatë të tensionuar në ambientin e punës dhe hedh dritë mbi pasojat serioze të sjelljes së Gjestit ndaj stafit të Onima-s.