Flora Hoxha, 76 vjeç, nga fshati Progër i Devollit, e raportuar e zhdukur që prej mëngjesit të 21 nëntorit, është gjetur e mbytur nga forcat e kërkim-shpëtimit. Konfirmimi erdhi nga autoritetet lokale, pasi djali i saj sinjalizoi një ditë më parë largimin e të moshuarës nga banesa.

Sipas familjarëve, Hoxha vuante nga demenca, gjë që dyshohet se e ka shtyrë të largohej pa orientim nga shtëpia. Policia kishte njoftuar se për shkak të reshjeve të dendura, zona ishte prekur nga përmbytjet, çka ngriti dyshimin se e moshuara mund të ishte marrë nga rrjedha e ujit.

Kërkimet kanë vijuar pa ndërprerje që nga mëngjesi i djeshëm, ndërsa sot u konfirmua gjetja e trupit të pajetë.

Autoritetet raportojnë se situata meteorologjike në qark është stabilizuar gjatë natës, pasi nuk janë shënuar reshje të tjera, por pritet një përditësim i plotë mbi gjendjen në orët e ardhshme.