Gjatë protestës së opozitës kundër censurës në sheshin Skënderbej, përballë godinës së qeverisë, foli edhe Artemisa Zenuni, një gjimnaziste dhe anëtare e Forumit Rinor të Partisë Demokratike.

Në fjalën e saj, ajo e cilësoi censurën si një kërcënim të drejtpërdrejtë ndaj demokracisë dhe një përpjekje për të heshtur zërat kritikë.

“Demokracia lulëzon në tokën e lirisë së shprehjes, kur fjalët, idetë dhe mendjet janë të lira. Censura është një hije e errët që kërcënon të mbulojë dritën e demokracisë. Në një shoqëri demokratike, çdo individ ka të drejtën të shprehë mendimet e tij, të kritikojë, të debatojë apo edhe të kërkojë ndryshim. Censura e shkel këtë të drejtë themelore dhe krijon një atmosferë frike,” tha Zenuni.

Ajo u bëri thirrje qytetarëve që të mbrojnë lirinë e fjalës dhe të mos lejojnë që censura të shndërrohet në një mjet për shtypjen e mendimit të lirë.

“Censura është një armë e rrezikshme që përdoret për të heshtur zërat tanë. Ne duhet të qëndrojmë të vendosur për të mbrojtur lirinë e fjalës. Në një shoqëri demokratike, censura duhet të trajtohet me shumë kujdes dhe të mos lejohet të përhapet. Në vend të saj, duhet të promovohet liria e shprehjes dhe të mbrohet e drejta e çdo individi për të shprehur mendimet e tij pa frikë,” theksoi ajo.

Protesta kundër mbylljes së TikTok dhe kundër censurës ka mbledhur qytetarë, të rinj dhe përfaqësues të opozitës, të cilët e konsiderojnë këtë akt një goditje ndaj të drejtave themelore në një shoqëri demokratike.