Një ngjarje tragjike u regjistrua mbrëmjen e djeshme në aksin rrugor “Këlcyrë–Përmet”, ku një 71-vjeçar që po lëvizte me biçikletë humbi jetën si pasojë e një aksidenti automobilistik. Sipas njoftimit zyrtar të Policisë së Gjirokastrës, drejtuesi i mjetit, një 36-vjeçar nga Përmeti, është arrestuar në flagrancë, pasi rezultoi se po drejtonte automjetin tip furgon në gjendje të dehur.

Shtetasi D. B., 36 vjeç, u ndalua menjëherë pas ngjarjes nga specialistët e Seksionit të Trafikut Interurban dhe Urban të Policisë Vendore, ndërsa viktima, shtetasi R. N., banues në Përmet, u transportua me urgjencë në spital, ku fatkeqësisht ndërroi jetë si pasojë e plagëve të marra.

Autoritetet bëjnë me dije se materialet procedurale janë referuar Prokurorisë pranë Gjykatës së Shkallës së Parë të Juridiksionit të Përgjithshëm në Gjirokastër, për vijimin e hetimeve dhe ndjekjen penale të drejtuesit të mjetit.

Policia u bën thirrje drejtuesve të automjeteve që të respektojnë rregullat e qarkullimit rrugor dhe të shmangin drejtimin e mjetit nën efektin e alkoolit, për të mos rrezikuar jetën e tyre dhe të të tjerëve.