Përfaqësuesja e Kryeministrisë ka paraqitur qëndrimin zyrtar të qeverisë në lidhje me çështjen e pezullimit nga detyra të ministres Belinda Balluku, duke theksuar se rasti nuk përbën një ankim kushtetues individual, por lidhet me marrëdhëniet ndërmjet pushteteve.

Sipas saj, çështja nuk ka më të bëjë me objektin e procedimit penal, por me kompetencat institucionale dhe kufijtë e tyre. “A ka të drejtë gjykata penale të pezullojë nga detyra një ministër? Ne vlerësojmë se jo,” u shpreh ajo, duke shtuar se argumentet konkrete i përkasin shqyrtimit në themel të çështjes.

Përfaqësuesja e Kryeministrisë theksoi se vendimi i GJKKO-së për pezullimin e ministrit sjell pasoja të drejtpërdrejta në funksionimin e ekzekutivit. Sipas saj, me këtë masë është pezulluar në praktikë edhe vendimmarrja e ministrit, pasi ai nuk mund të propozojë projektakte apo të ushtrojë kompetencat e tij.

“Pezullimi e detyron kryeministrin që të propozojë shkarkimin e ministrit dhe të emërojë një ministër të ri. Nuk mund të mohohet se masa e sigurimit penal sjell pasoja në veprimtarinë e Këshillit të Ministrave dhe të kryeministrit,” deklaroi ajo.

Në përfundim, Kryeministria nënvizoi se nëse këto pasoja janë apo jo të devijueshme, kjo mbetet për t’u vlerësuar në themel të çështjes nga Gjykata Kushtetuese.