Gjykata e Posaçme e Shkallës së Parë për Krime të Rënda (GJKKO) ka rrëzuar kërkesën e bashkëshortes së kryetarit të Bashkisë Tiranë, Erion Veliajt, për kthimin e telefonit dhe disa pajisjeve dhe dokumenteve të sekuestruara nga Prokuroria e Posaçme gjatë një kontrolli të realizuar më 6 dhjetor. Vendimi i kësaj kërkese u mor nga gjyqtarja Atalanta Zeqiri.

Kontrollet u ushtruan me urdhër të prokurorit Ols Dados, ku agjentët e BKH-së sekuestruan celularin e Ajola Xoxës, bashkëshortes së Veliajt, dhe kryen kontrolle në qendrën “Harabel,” ku Xoxa është bashkëthemeluese. Në këtë seli, e cila ndodhet në zonën e ish-Bllokut në Tiranë, u sekuestruan dokumente dhe materiale të ndryshme që lidhen me hetimet për pasurinë e Erion Veliajt dhe familjarëve të tij.

Në lidhje me këtë çështje, një tjetër kërkesë është paraqitur në Apelin e Posaçëm nga avokatët mbrojtës, të cilët kanë argumentuar se kontrollet e BKH-së janë kryer në shkelje të ligjit procedurial dhe pa një shkak të ligjshëm. Ky ankim është caktuar për shqyrtim nga gjyqtarja Ilirjana Olldashi, por ende nuk është vendosur një datë për mbajtjen e seancës.

Ndërkohë, hetimet vazhdojnë për vëllain e kryebashkiakut të Tiranës, Arbër Veliaj, në kuadër të hetimeve që lidhen me pasuritë e familjes Veliaj.