Konflikti mes aksionarëve të Aeroportit të Vlorës ka marrë një kthesë të rëndësishme ligjore, teksa Gjykata e Apelit të Tiranës ka konfirmuar përjashtimin e biznesmenit kosovar Behgjet Pacolli nga administrimi i aeroportit deri në gjykimin në themel të çështjes me Valon Ademin.

Vendimi i marrë dje konfirmon masën e Gjykatës së Shkallës së Parë, e cila kishte pezulluar kompaninë Mabco S.A, nën pronësinë e Pacollit, nga e drejta e votës dhe menaxhimit të shoqërisë koncesionare Vlora International Airport. Si pasojë, administrimi i aeroportit kalon në duart e Ademit.

Konflikti mes dy aksionarëve shpërtheu publikisht verën e vitit të kaluar mbi aksionet e aeroportit, por situata u komplikuar nga një kredi e marrë nga Mabco. Sipas dokumenteve, kompania e Pacollit kishte marrë një kredi prej 100 milionë eurosh nga fondi investues guackë Delphos Compartment Bernina në Luksemburg. Kredia detyronte Aeroportin e Vlorës të figurojë si huamarrës shtesë, duke lënë fluksin e të ardhurave nga aeroporti peng të fondit.

Biznesmeni Valon Ademi akuzoi Pacollin për veprime në fshehtësi dhe në kundërshtim me ligjin. Ai i drejtoi padinë Gjykatës së Shkallës së Parë, kërkuar përjashtimin e Pacollit nga vendimmarrja dhe pezullimin e votës derisa çështja të shqyrtohet në themel. Gjykata vendosi në favor të Ademit, duke bllokuar ndërhyrjen e Pacollit në administrim.

Pas vendimit, Pacolli reagoi publikisht, duke deklaruar se po i merrej kompania, pavarësisht se zotëronte 98% të aksioneve të Mabco-s. Megjithatë, Apeli la masën në fuqi, duke konfirmuar dyshimet e Ademit dhe duke bllokuar mundësinë që Aeroporti i Vlorës të përdorej si kolateral për kredisë së Delphos, fond i akuzuar nga Ademi për lidhje me interesat ruse.

Situata mbetet e tensionuar, ndërsa vendimi i Apelit rrit presionin mbi Pacollin dhe vendos një precedent për mënyrën e përdorimit të fondeve të jashtme dhe kredive në kompanitë koncesionare në Shqipëri.