Gjykata e Kukësit ka konfirmuar masat ndaj 22 efektivëve të policisë rrugore të cilët akuzohen për vjedhje të parave të gjobave të drejtuesve të automjeteve me targa të huaja në Rrugën e Kombit gjatë vitit të kaluar. Seanca, e cila zgjati mbi 9 orë, u përqendrua në shqyrtimin e provave të organit të akuzës, ndërsa avokatët mbrojtës paraqitën argumentet e tyre lidhur me veprimet apo mosveprimet e të akuzuarve.

Të akuzuarit shprehën kundërshtime lidhur me akuzat, çka ndikoi në zgjatjen e seancës. Në përfundim, gjykata vendosi të mos ndryshojë masat e sigurisë për efektivët e përfshirë në skemën e vjedhjes, ku akuzohet se paratë e gjobave të paguara nga drejtuesit e automjeteve, kryesisht nga shqiptarë të Kosovës, nuk ishin arkëtuar në zyrat e financave siç duhej.

Hetimet zbuluan skemën pasi një shqiptar i Kosovës, i cili ishte ndaluar për herë të dytë, rezultoi ende debitor për një gjobë që kishte paguar më parë. Në mesin e të akuzuarve është edhe Gramoz Dafku, ish-shef i seksionit të qarkullimit në Rrugën e Kombit.

Skema e vjedhjes së parave dyshohet të ketë ndodhur gjatë vitit 2023, dhe deri më tani janë sekuestruar procesverbale dhe materiale të tjera nga Agjencia e Mbikëqyrjes Policore (AMP) për të dokumentuar veprën penale. Në total, janë identifikuar 160 gjoba në vlerë rreth 1.3 milionë lekë, ndërsa me kamatë vonesat, shuma arrin në 2.2 milionë lekë.