Ish-Presidenti i Republikës, Ilir Meta, do të dalë para Gjykatës së Posaçme më 20 qershor, në orën 11:30, për shqyrtimin e kërkesës së tij për verifikimin e kushteve të masës së sigurisë dhe zëvendësimin e arrestimit me burg me një masë më të butë.
Seanca do të zhvillohet nga gjyqtari i hetimit paraprak Erjon Çela, ndërsa Meta vijon të qëndrojë në paraburgim prej 21 tetorit 2024.
Avokatët e Metës argumentojnë se:
• Afatet e paraburgimit janë tejkaluar, pasi kanë kaluar 8 muaj pa u dhënë vendim apo pa pasur një zhvillim konkret procedurial.
• SPAK nuk ka paraqitur raportet dy mujore, që janë të detyrueshme sipas ligjit për mbajtjen në burg të një të dyshuari për një periudhë të zgjatur.
• Janë cituar vendime të Gjykatës Europiane për të Drejtat e Njeriut (GJEDNJ) që sipas mbrojtjes mbështesin qëndrimin e tyre, përfshirë çështjen “Gëllçi”, ku është konstatuar shkelje e të drejtës për gjykim brenda një afati të arsyeshëm dhe për mbajtjen e paligjshme në paraburgim.
Kjo kërkesë pritet të jetë një provë kyçe për trajtimin e mëtejshëm të çështjes ndaj Metës, i cili akuzohet nga SPAK për korrupsion dhe pastrim parash, ndërkohë që vetë ai i ka quajtur akuzat si “të stisura politikisht”.
Vendimi që do të merret më 20 qershor nga Gjykata e Posaçme do të përcaktojë nëse Meta do të vijojë të qëndrojë në burg apo do të lejohet të mbrohet në gjendje të lirë apo me një masë më të lehtë sigurie, si arrest shtëpie apo detyrim paraqitjeje.
