Gjykata Kombëtare e Spanjës ka vendosur që Lulzim Berisha, një prej të shumëkërkuarve nga autoritetet shqiptare, të ekstradohet në Shqipëri. Vendimi u mor pas një seance gjyqësore të zhvilluar më 2 korrik, pavarësisht kundërshtimeve nga ana e Berishës, i cili pretendonte se jeta e tij ishte në rrezik në Shqipëri për shkak të së shkuarës së tij dhe frikës nga hakmarrja.

Në gjyq, Prokuroria spanjolle theksoi rrezikshmërinë që Berisha paraqet dhe akuzat e ngritura nga Prokuroria e Posaçme në Shqipëri. Prokuroria argumentoi se jeta e Berishës do të ishte në rrezik vetëm jashtë burgut dhe se duke e dorëzuar atë autoriteteve shqiptare, ai nuk do të përballet me asnjë rrezik në ambiente të mbyllura.

Pavarësisht vendimit, Lulzim Berisha, ish-kreu i bandës së Durrësit, ka të drejtën për të apeluar këtë vendim në Gjykatën e Lartë të Spanjës. Ky vendim pason një seri seancash gjyqësore ku Berisha dhe avokatët e tij përpiqeshin të shmangnin ekstradimin, duke përmendur rreziqet e mundshme për jetën e tij në Shqipëri.

Gazetari Ervin Leka raportoi se në një seancë të mëparshme, Berisha kishte paraqitur disa argumente, përfshirë pretendime për atentate të mëparshme, për të shmangur ekstradimin. Megjithatë, prokuroria e Spanjës argumentoi se ai do të ishte i sigurt nëse gjykohet në Shqipëri në kushte të mbrojtura dhe të monitoruara nga autoritetet.