Gjykata Kushtetuese e refuzoi të merrte në shqyrtim kërkesën e deputetëve të opozitës për imunitetin e ish-kryeministrit Sali Berisha. Deputetët e Partisë Demokratike kishin kërkuar shpalljen antikushtetuese të masave të zbatuara nga SPAK kundër liderit demokrat.

Në vendimin e Gjykatës Kushtetuese, thuhet se “pretendimet e kërkuesit dhe kërkesa për pezullimin e masave të sigurimit nuk mund të shqyrtohen në themelin e tyre”, duke vendosur moskalimin e çështjes për shqyrtim në seancë plenare.

Deputetët e opozitës argumentuan se masat e marrura nga SPAK, përfshirë “detyrim paraqitje” dhe “pengim për të dalë nga vendi”, janë antikushtetuese, duke theksuar se SPAK nuk kishte marrë paraprakisht autorizim nga Kuvendi për këto veprime.

Në kërkesën e tyre, demokratët kërkonin zgjidhjen e konfliktit të kompetencave ligjore mes SPAK dhe Kuvendit, në lidhje me “heqjen ose kufizimin e lirisë së një deputeti”, duke theksuar se këto kufizime kryhen nga pushteti gjyqësor pa paraprakisht pyetur, kërkuar, dhe marrë autorizimin e Kuvendit.