Gjykata e Durrësit ka lënë në fuqi masën e sigurisë “arrest me burg” për ish-drejtorin e IEVP Durrës, Indrit Cërloj, i arrestuar tre ditë më parë në lidhje me arratisjen e të paraburgosurit Altin Ndoci. Masa ishte vendosur fillimisht më 16 janar dhe u konfirmua sërish në seancën e sotme.

Cërloj akuzohet për veprën penale të “shpërdorimit të detyrës”, ndërsa në të njëjtën çështje gjykata la në fuqi edhe masën “arrest shtëpie” për mjeken Ylvete Sema, 65 vjeçe.

Ndërkohë, nga Drejtoria e Përgjithshme e Burgjeve bëhet me dije se drejtori i komanduar i IEVP Durrës, Edmond Llabani, ka pësuar hemorragji cerebrale dhe ndodhet i shtruar në QSUT. Sipas njoftimit zyrtar, pranë tij ndodhet edhe Drejtori i Përgjithshëm i Burgjeve.

Pak ditë më parë, Ministri i Drejtësisë, Besfort Lamallari, firmosi shkarkimin e Indrit Cërloj nga detyra, një ditë pas arratisjes së Altin Ndocit, i cili u largua gjatë shoqërimit për një kontroll mjekësor në spitalin e Durrësit.

Pas ngjarjes, u pezullua i gjithë zinxhiri komandues i IEVP Durrës. Sipas verifikimeve paraprake, rezulton se institucioni nuk kishte raportuar pranë Drejtorisë së Përgjithshme të Burgjeve as planifikimin dhe as realizimin e vizitës mjekësore, në kundërshtim me aktet nënligjore në fuqi. Gjithashtu, nuk janë respektuar procedurat standarde për shoqërimin e të paraburgosurve dhe të dënuarve.

Në kuadër të hetimeve, në pranga janë vënë tetë persona:
• Komisar Dezdemon Pazaj – punonjës i Policisë së Burgjeve
• Komisar Violeta Uka – punonjëse e Policisë së Burgjeve
• Kryeinspektor Dorjan Saraçi – punonjës i Policisë së Burgjeve
• Inspektor Sali Ferrollari – punonjës i Policisë së Burgjeve
• Inspektor Fatjon Braçi – punonjës i Policisë së Burgjeve
• Inspektor Preng Marvataj – punonjës i Policisë së Burgjeve
• Kryeinspektor Aranit Çela – punonjës i Policisë së Burgjeve
• Kryeinfermier Aulon Quku – punonjës i IEVP Durrës

Hetimet vijojnë për zbardhjen e plotë të rrethanave të arratisjes dhe përgjegjësive institucionale.