Presidentja e Komisionit Evropian, Ursula von der Leyen, ka deklaruar se Bashkimi Evropian kërkon “respekt të padiskutueshëm për sovranitetin e Groenlandës dhe Mbretërisë së Danimarkës”, gjatë një takimi me një delegacion të Kongresit Amerikan në Davos të Zvicrës, në kuadër të Forumit Ekonomik Botëror.
Në një postim në platformën X, von der Leyen theksoi se kjo çështje ka rëndësi të veçantë për marrëdhëniet transatlantike, duke nënvizuar domosdoshmërinë e respektimit të sovranitetit dhe integritetit territorial të aleatëve.
Ajo siguroi gjithashtu se Bashkimi Evropian synon të vijojë bashkëpunimin e ngushtë me Shtetet e Bashkuara të Amerikës, NATO-n dhe partnerët e tjerë strategjikë, në koordinim të plotë me Danimarkën, për të avancuar interesat e përbashkëta të sigurisë.
Gjatë takimit, palët diskutuan edhe mbi tregtinë dhe investimet transatlantike, ku presidentja e Komisionit Evropian vuri në dukje se vendosja e tarifave nuk është në interesin e përbashkët të BE-së dhe SHBA-së.
Po ashtu, von der Leyen bëri të ditur se në fokus të bisedimeve ishin edhe përpjekjet ndërkombëtare për “arritjen e një paqeje të drejtë dhe të qëndrueshme në Ukrainë”, duke theksuar rëndësinë e koordinimit mes aleatëve në këtë proces.
