Policia e Lushnjës ka ndërmarrë një operacion kundër aktiviteteve të paligjshme të lojërave të fatit, duke goditur një rast të ushtrimit informal të basteve sportive, në shkelje të ligjit dhe jashtë çdo forme të kontrollit shtetëror.

Sipas njoftimit zyrtar, Specialistët për Hetimin e Krimeve pranë Komisariatit të Policisë Lushnjë kanë referuar materialet në Prokurori, ku ka nisur procedimi penal për D. H., 47 vjeç dhe L. K., 22 vjeç, të dy banues në Kolonjë.

Nga hetimet paraprake rezulton se të dy shtetasit dyshohet se organizonin baste sportive përmes celularëve, duke anashkaluar çdo licencë dhe pa qenë subjekt i ndonjë kontrolli apo rregullimi shtetëror.

Policia e Lushnjës thekson se do të vijojë kontrollet intensive në terren për të identifikuar dhe ndëshkuar çdo rast të lojërave të fatit të paligjshme, një aktivitet që përbën shkelje të rëndë të ligjit në fuqi.

Hetimet janë në vijim.