Policia ka arrestuar dy shtetas të dyshuar për ndihmë në kalimin e paligjshëm të kufijve, pasi transportonin emigrantë që synonin të shkonin ilegalisht drejt vendeve të Bashkimit Europian.

Si rezultat i operacionit të koduar “Relay 4”, u vunë në pranga Arlen Coku, 38 vjeç, banues në Tiranë, dhe Endrit Tota, 35 vjeç, banues në Kukës. Sipas uniformave blu, dy të arrestuarit bashkëpunonin mes tyre për organizimin e këtij aktiviteti kriminal.

Gjatë kontrollit në aksin rrugor “Tiranë–Durrës”, policia ndaloi automjetin që drejtohej nga 38-vjeçari Coku, në të cilin ndodheshin edhe katër emigrantë. Ata po transportoheshin drejt Kukësit, ku më pas do të ndihmoheshin nga 35-vjeçari Tota për të kaluar ilegalisht në shtetet e BE-së.

Në kuadër të operacionit u sekuestruan automjeti i përdorur për transportin e emigrantëve, si edhe dy aparate celularë, të cilët do të shërbejnë si prova materiale në hetim.

Policia bën me dije se hetimet janë kryer prej disa javësh, me metoda speciale, ndërsa në bashkëpunim me Prokurorinë po vijojnë veprimet për identifikimin e personave të tjerë të përfshirë në këtë veprimtari kriminale.

Materialet procedurale i janë referuar Prokurorisë së Tiranës për veprime të mëtejshme ligjore.