Liverpooli përballet me një humbje të rëndë pas dëmtimit të sulmuesit suedez Alexander Isak, i cili do të qëndrojë jashtë fushave për rreth dy muaj. Isak iu nënshtrua ndërhyrjes kirurgjikale mbrëmjen e djeshme pas frakturës në fibulë, një dëmtim që ka tronditur skuadrën dhe tifozët e Reds.

Trajneri i Liverpoolit, Arne Slot, konfirmoi lajmin gjatë një konference për shtyp, duke kritikuar ashpër ndërhyrjen e mbrojtësit të Tottenham, Van de Ven, që shkaktoi dëmtimin. “Ishte një ndërhyrje e pamatur dhe e rrezikshme”, u shpreh Slot, duke shfaqur hapur pakënaqësinë e tij ndaj situatës.

Slot nuk ka dhënë detaje nëse Liverpooli do të aktivizohet në merkato për të sjellë një sulmues zëvendësues, duke theksuar se prioriteti i tij është përqendrimi te ndeshjet e ardhshme. “Në këtë moment, mendimi im i parë dhe i vetëm janë dy ndeshjet e radhës që do t’i luajmë në shtëpi. Është koha që lojtarët që kemi në dispozicion të japin maksimumin për të arritur rezultatet që duam”, shtoi ai.

Liverpooli do të rikthehet në fushë të shtunën e ardhshme për të pritur Wolves, skuadrën e fundit në renditje. Një sfidë në letër e favorshme, por që vjen në një moment delikat për The Reds, të cilët do të duhet të riorganizojnë repartin ofensiv pa një nga yjet e tyre kryesorë.