Një tjetër operacion i Prokurorisë së Posaçme ka çuar në ndalimin e tre zyrtarëve të lartë të Policisë Rrugore të Tiranës, të dyshuar për korrupsion dhe shpërdorim detyre në lidhje me rastet e trajtimit të aksidenteve rrugore.

SPAK ka lëshuar urdhër-arrest për shefin e Qarkullimit Rrugor të Tiranës, Roven Zeka, si dhe për Shefin e Sektorit të Aksidenteve, Sokol Novaku. Të dy ndodhen tashmë nën masë arresti. Burimet konfirmojnë se ndaj tyre rëndojnë akuza për përfshirje në skema korruptive dhe mosveprim ligjor në trajtimin e aksidenteve rrugore.

Operacioni është ndjekur nga prokurori Klodian Braho, i cili drejton Sektorin Kundër Korrupsionit në SPAK.

Në kuadër të hetimeve është ndaluar edhe oficeri i Policisë Gjyqësore, Edison Tabaku, i cili ka qenë i angazhuar me hetimin e aksidenteve rrugore në Tiranë.

SPAK dyshon se zyrtarët kanë ndikuar në fshehjen ose manipulimin e provave në disa raste aksidentesh, në këmbim të përfitimeve të paligjshme. Hetimet vazhdojnë, ndërsa pritet të zbulohen edhe persona të tjerë të përfshirë në rrjetin e mundshëm të korrupsionit brenda strukturave të Policisë së Shtetit.