Kryeministri Edi Rama ka deklaruar se inspektimet e kryera nga Bashkimi Evropian konfirmojnë se Porti i Durrësit është i sigurt dhe përmbush standardet ndërkombëtare. Gjithashtu, ai njoftoi se ky qytet do të bëhet lokacioni i ardhshëm për ndërtimin e një porti strategjik të NATO-s.

Rama i është përgjigjur kritikave të opozitës, duke theksuar se akuzat për mbetje të rrezikshme janë të pabaza dhe synojnë të njollosin imazhin e vendit.

“Goja shumë tellallëshe e ka marrë të mirëqenë për tua nxirë realitetin shqiptarëve. Mbetjet e dyshuara do të vijnë në Shqipëri bashkë me fundin e botës,” ironizoi Rama.

Ai gjithashtu vuri në dukje rëndësinë e inspektimeve dhe certifikimeve të rrepta të kryera nga autoritetet evropiane, duke përforcuar idenë se Durrësi, përveçse një port i sigurt, do të shërbejë së shpejti si vendi për portin e ri të NATO-s, duke rritur kështu rëndësinë strategjike të Shqipërisë në rajon.